Kalaallit Nunaata Radioa (KNR)
Kalaallit Nunaata Radioa (KNR) Kalaallit Nunaata nuna tamakkerlugu radioqarfigalugulu tv-ikkut aallakaatitsisarfigaa. KNR suliffeqarfiuvoq namminersortoq pisortanit pigineqartoq Namminersorlutik Oqartussanit ingerlanneqartoq. KNR-ip radiokkut tv-ikkullu aallakaatittagai nuna tamakkerlugu tusarnaarneqarlutillu isiginnaarneqarsinnaapput. KNR ingerlanneqarnerminut aningaasanut inatsimmit tapiiffigineqartarpoq.
KNR pillugu paasissutisssat erseqqinnerusut uani takukkit: www.knr.gl
Najukkani radio aamma TV
Illoqarfinni arlalinni radiukkut aallakaatitsisarfeqarlunilu tv-ikkut peqatigiiffeqarpoq. TV-kkut peqatigiiffiit arlallit najukkani TV-qarfinngorlutik ineriartorsimapput, taakkuuppullu najukkami innuttaasunut KNR-mullu aallakaatitassianik nutaarsiassanillu nioqqutissiortuusut.
Sinerissami radioqarfiit tv-qarfiillu Sinerissami Takusassiiviit Tusagassiiviillu Kattuffianni ataatsimoorlutik kattuffeqarput.
Sinerissami tv-qarfiit annerpaat tassaapput Nuuk TV, Sisimiut TV, Arctic TV Ilulissani, Akisuasoq Radio & TV Maniitsumi aamma Tusaat TV Qaqortumi.
Radioqarfiit annerpaat tassaapput Sisimiut Tusaataat, Nuuk FM, Akisuasoq Radio & TV aamma Ilulissat Radioa
Radioqarfiit tv-qarfiillu ilaat pillugit paasissutissat erseqinnerusut ukunani takukkit: www.nuuktv.gl
Aviisit nuna tamakkerlugu saqqummersartut
Aviisit marluk nuna tamakkerlugu saqqummertarput, Atuagagdliutit/Grønlandsposten (AG) aamma Sermitsiaq Nuummi suliarneqartarput.
Atuagagdliutit/Grønlandsposten pingasunngornerni saqqummertarpoq.
Sermitsiaq tallimanngornerit tamaasa saqqummertarpoq.
Atuagagdliutit/Grønlandsposten aamma Sermitsiaq pillugit paasissutissat erseqqinnerusut uani takukkit: www.sermitsiaq.ag
Najukkani aviisit
Illoqarfinni arlalinni aviiseqarpoq. Illoqarfinni aviisit annerpaat tassaapput Kujataamiu Nutaaq Qaqortumi saqqummersartoq, Nuuk ugeavis Nuummeersoq aamma Sivdleq Sisimiuni saqqummersartoq.
Najukkani aviisit nittartagaat ukunani takuneqarsinnaapput: www.sermitsiaq.ag aamma www.kujataamiu.gl